Marriage in Ten Minutes : పెళ్లిళ్లు స్వర్గంలో జరుగుతాయంటారు. పెళ్లంటే నూరేళ్ల పంట అంటారు. కాపురం చేసే కళ కాలు తొక్కే నాడే తెలుస్తుంది. ఆలుమగల బంధంలో పెళ్లి అనే తంతుతోనే ఒక్కటవుతారు. వరుడు, వధువు వివాహమనే బందంతో కలకాలం ఒక్కటిగా నిలుస్తారు. అందుకే మన వివాహ వ్యవస్థకు ఇతర దేశాల్లో కూడా మంచి ఆదరణ ఉంటుంది. అలాంటి పెళ్లి పీటల మీద చెడిపోతే పెళ్లి పెటాకులు అయింది అంటారు.
పెళ్లి అనగానే పచ్చని పందిళ్లు, ఇళ్లంతా బంధువులు, హడావిడులు కనిపిస్తుంటాయి. కానీ పెళ్లి సజావుగా సాగితే అందరు సంతోషంగా ఉంటారు. కానీ పెళ్లి పెటాకులైతే అందరు బాధ వ్యక్తం చేస్తారు. ఇక్కడ కూడా పెళ్లి పెటాకులయింది. పెళ్లి ఆగటానికి పెద్ద కారణం కూడా కాదు. చిన్న విషయానికే పెళ్లి కుమారుడు పెళ్లి వద్దని మొండికేయడం గమనార్హం.
విశాఖకు చెందిన యువతితో గోపాలపట్నం ప్రాంతానికి చెందిన యువకుడితో పెళ్లి చేయడానికి పెద్దలు నిర్ణయించారు. నిన్న మధ్యాహ్నమే పెళ్లి జరగాల్సి ఉంది. క్రిస్టియన్ పద్ధతిలో పెళ్లి జరపాలని అనుకున్నారు. అందరు పెళ్లి మండపానికి చేరుకున్నారు. కొద్ది క్షణాల్లో పెళ్లి తంతు ప్రారంభం అవుతుంది. బంధువులంతా సందడిగా ఉన్నారు. అంతలోనే షాక్. నాకు పెళ్లి ఇష్టం లేదని వరుడు చెప్పడంతో అందరు అవాక్కయ్యారు.
అసలు పెళ్లి ఎందుకు వద్దంటున్నాడంటే నిశ్చితార్థం అయిన నాటి నుంచి ఇద్దరు ఫోన్ లో మాట్లాడుకుంటున్నారు. కానీ ఒక రోజు మాత్రం రెండు సార్లు వరుడు ఫోన్ చేసినా వధువు స్పందించలేదు. దీంతో మనసులో పెట్టుకున్న అతడు చివరకు పెళ్లి వద్దని మొండికేశాడు. పెద్దలు అతడిని ఒప్పించాలని చూసినా చివరకు వధువు కూడా మొరాయించింది. అతడిని చేసుకోనని తెగేసి చెప్పింది. దీంతో పెళ్లి కాస్త పెటాకులయింది.
