మహానటులు అక్కినేని నాగేశ్వర్ రావు హీరోగా నటించిన సూపర్ హిట్ చిత్రం ” రాముడు కాదు కృష్ణుడు ”. దర్శకరత్న దాసరి నారాయణరావు దర్శకత్వంలో ఎన్ . ఆర్ . అనురాధాదేవి ఈ చిత్రాన్ని నిర్మించారు. 1983 మార్చి 25 న ఈ చిత్రం విడుదల అయ్యింది. అక్కినేని సరసన జయసుధ , రాధిక నటించారు.
ఇక కీలక పాత్రలలో రావుగోపాలరావు , కైకాల సత్యనారాయణ , ప్రభాకర్ రెడ్డి , గిరిబాబు , అల్లు రామలింగయ్య , సూర్యకాంతం , రాజసులోచన , జయంతి , సుకుమారి , జయమాలిని , మమత , అశోక్ కుమార్ , జగ్గారావు , టెలిఫోన్ సత్యనారాయణ తదితరులు నటించారు. ఇక ఈ చిత్రానికి చక్రవర్తి సంగీతం అందించారు. చక్రవర్తి అందించిన పాటలలో ” ఒక లైలా కోసం …… తిరిగాను దేశం ” అనే యావత్ తెలుగు ప్రపంచాన్ని ఒక ఊపు ఊపేసింది. ఈ పాట అప్పట్లోనే కాదు ఇప్పటికీ ఎప్పటికీ ఎవర్ గ్రీన్ అనే చెప్పాలి.
అలాగే ఆ పాటతో పాటుగా మిగతా పాటలు కూడా సూపర్ హిట్ అయ్యాయి. అయితే అన్నింటినీ మించి ఒక లైలా కోసం పాట యువతను ఉర్రూతలూగించింది. 1983 లో విడుదలైన రాముడు కాదు కృష్ణుడు మంచి విజయాన్ని అందుకుంది. ఇక ఈ సినిమా విడుదలై నేటికి 40 సంవత్సరాలు. రాముడు కాదు కృష్ణుడు చిత్రం 40 ఏళ్ళు పూర్తి చేసుకోవడంతో ఆనాటి మధుర స్మృతులను నెమరు వేసుకుంటున్నారు అక్కినేని అభిమానులు.
