GTA Anniversary 2023 : ఎన్నారైల ఆధ్వర్యంలో జీటీఏ(గ్లోబల్ తెలంగాణ అసోసియేషన్) తొలి వార్షికోత్సవ వేడుకలు హైదరాబాద్ మారియట్ హోటల్ లో ఘనంగా జరిగాయి. ప్రవాస తెలంగాణ వాసులతో కలిపి ఏర్పాటు చేసిన గ్లోబల్ తెలంగాణ అసోసియేషన్ ఫోరం ఏడాది పూర్తయిన సందర్భంగా ఈ కార్యక్రమాన్ని నిర్వహించారు. ఈ వేడుకకు ఎంపీ బండి సంజయ్ తో పాటు పలువురు ఎమ్మెల్యేలు ముఖ్య అతిథులుగా విచ్చేశారు.
ఈసందర్భంగా బండి సంజయ్ మాట్లాడుతూ.. శక్తివంతమైన భారత్ ను నిర్మించడంలో జీటీఏ భాగస్వామ్యం కావాలని కోరారు. వివిధ దేశాల్లోని తెలంగాణ వారందరినీ ఒక్కచోటకు చేర్చుతున్న జీటీఏను ఆయన అభినందించారు. తనతో పాటు ఈ కార్యక్రమంలో పాల్గొన్న నేతలు, ఎంతోమంది ఎన్నారైలు డబ్బు లేకపోయినా కష్టపడి పైకి వచ్చినవాళ్లేనన్నారు. ఎక్కడో విదేశాల్లో ఉంటూ భారత్ అభ్యున్నతికి కృషి చేస్తున్న ఎన్నారైల సేవలు మరువలేనివన్నారు.
తెలంగాణ సంస్కృతి, సంప్రదాయాల గురించి ఇతర దేశాల్లో చాటుతుంది తామేనని జీటీఏ ఫౌండర్, ఇండియా చైర్మన్ మల్లారెడ్డి తెలిపారు. ఎన్నారై తలుచుకుంటే.. రాజకీయ నాయకుడి కంటే ఎక్కువగా అభివృద్ధి చేసి చూపించగలడని ఆయన చెప్పారు. ఎన్నారైలు అంటే సంవత్సరానికి ఒకసారి వచ్చి కుటుంబాన్ని కలిసే వాళ్లు మాత్రమే కాదని జీటీఏ నిరూపించిందని ఎమ్మెల్యే యశస్విని రెడ్డి అన్నారు. ఎన్నారైలు తలుచుకుంటే దేన్నైనా సాధించి చూపిస్తారని, వాళ్లను తక్కువ అంచనా వేయవద్దని సూచించారు.
కార్యక్రమంలో భారత్ కు చెందిన 150 మంది బోర్డు సభ్యులు హాజరయ్యారు. వీరిలో గ్రేట్ అండ్ మీట్ కార్యక్రమం చైర్మన్ మల్లారెడ్డి, జీటీఏ అడ్వయిజర్ చైర్ రవీందర్ రెడ్డి, గ్లోబల్ తెలంగాణ అసోసియేషన్ ఇండియా ప్రెసిడెంట్ అండ్ వైస్ చైర్మన్ శ్రీనివాస్ రెడ్డి, యోయో మీడియా సీఈవో నవీన్ రెడ్డి, ప్రజాప్రతినిధులు పాయల్ శంకర్, రాకేశ్ రెడ్డి, కుంభం అనిల్ కుమార్ రెడ్డి, కసిరెడ్డి నారాయణ రెడ్డి తదితరులు పాల్గొన్నారు. ఈ సందర్భంగా గ్లోబల్ ఎన్నారైలు గ్రేట్ అండ్ మీట్ లో పాల్గొని విజయవంతం చేసిన ప్రతీ ఒక్కరికి, స్పాన్సర్లకు జీటీఏ ఫౌండర్ చైర్మన్ మల్లారెడ్డి ధన్యవాదాలు తెలిపారు.
