Canada : భారత్ లో గ్రాడ్యుయేట్ అయిన ప్రతీ ఒక్కరి కల విదేశాల్లో ఉద్యోగం చేయడం. అమెరికా, కెనడా, యూకే లాంటి దేశాల్లో మంచి జీతంతో ఉద్యోగం చేయాలని తహతహలాడుతుంటారు. తల్లిదండ్రులు కూడా ఇదే ఆలోచనగా ఉంటారు. ‘‘తమ వాడు అమెరికాలో ఉన్నాడు..తమ అమ్మాయి కెనడాలో ఉంది..’’ అని చుట్టాలతో చెప్పుకోవడానికి గర్వపడుతుంటారు. పిల్లలను విదేశాల్లో స్థిరపడేలా చేసేందుకు స్థోమత లేకపోయినా లక్షల్లో ఖర్చు చేస్తుంటారు. భారత్ లో పుట్టిన సగటు తల్లిదండ్రుల ఆలోచన అంతా ఇదే.
అయితే కెనడా, అమెరికాల్లో పరిస్థితులు బాగోలేవని కెనడాలో 25 సంవత్సరాల కిందట సెటిల్ అయిన ఓ తెలుగు వ్యక్తి ఓ వీడియో ద్వారా విన్నవించగా..ప్రస్తుతం ఆ వీడియో వైరల్ గా మారింది. ఇంతకీ ఆయన ఏం చెప్పాడంటే..‘‘నేను కెనడాలో పడని కష్టం లేదు. జీరో నుంచి హై పొజిషన్ లో ఉన్నాను. అయితే ప్రస్తుతం కెనడాలో ఉద్యోగాలు లేవు. రెఫరెన్స్ తో కూడా ఉద్యోగాలు లేవు. ఇక్కడి ఆర్థిక పరిస్థితులు బాగాలేవు. అలాగే లివింగ్ కాస్ట్, నిత్యావసర సరుకుల ఖర్చులు, ఇంట్రెస్ట్ రేట్లు పెరిగిపోతున్నాయి. పేద, మధ్య తరగతి భారత తల్లిదండ్రులు మీ పిల్లలను కెనడా, అమెరికాకు పంపించవద్దు. వీటి కంటే యూకే మోస్తారుగా ఉంది.’’ అంటూ చెప్పుకొచ్చాడు.
కెనడా ప్రధాని ట్రూడో చేసిన పనుల వల్ల దేశంలో నిరుద్యోగం పెరిగిపోయిందని సదరు వ్యక్తి ఆ వీడియోలో గోడు వెల్లబోసుకున్నాడు. విపరీత వలసల వల్ల కెనడాలో ఉద్యోగాలు పోతున్నాయని, ఈ విషయంపై సీరియస్ గా పట్టించుకోవాలని కెనడా రాజకీయ నాయకులకు సూచించారు. పార్ట్ టైం ఉద్యోగాలు కూడా లేవన్నారు. కెనడా మార్కెట్ డెడ్ అయ్యిందని చెప్పారు. కెనడాలో ఉద్యోగం చేద్దామనుకునే భారతీయులు, ముఖ్యంగా తెలుగు ప్రజలు ఒకటికి రెండు సార్లు ఆలోచించుకోవాలని హితువు పలికారు.
