‘Bro: The Avatar’ పవన్ కళ్యాణ్, సాయి ధరమ్ తేజ్ జంటగా సముద్రఖని దర్శకత్వంలో తెరకెక్కుతున్న చిత్రం ‘బ్రో: ది అవతార్’. త్రివిక్రమ్ శ్రీనివాస్ ఈ సినిమా స్క్రిప్ట్ కరెక్షన్స్, డైలాగ్స్ సమకూరుస్తున్నారు. ఈ చిత్రం సరిగ్గా రెండు వారాల్లో విడుదల కావాల్సి ఉంది, అయితే ఇంకా పూర్తి స్థాయిలో పోస్ట్ ప్రొడక్షన్ పనులు కావాల్సి ఉంది. ప్రత్యేకించి, ఇద్దరు హీరోల డబ్బింగ్ పనులు ఇంకా పెండింగ్‌లో ఉన్నాయి. ఈ సినిమాను ఈ నెల 21 రిలీజ్ చేస్తామని మేకర్స్ ఇప్పటికే ప్రకటించారు. ఈ నేపథ్యలో డబ్బింగ్ పనులను వారంలోగా పూర్తి చేయాల్సి ఉంటుంది.
అయితే, పవన్ కళ్యాణ్ ప్రస్తుతం ‘వారాహి యాత్ర’లో బిజీగా ఉన్నారు. ఈ యాత్రకు సంబంధించి ఈ వారంలో మూడు రోజుల గ్యాప్ వస్తుంది. ఆ సమయంలోగా డబ్బింగ్ పూర్తి చేస్తారా? అనేది ఇంత వరకు స్పష్టం కాలేదు. సాయి ధరమ్ తేజ్ చాలా వరకు తన పోర్షన్ పూర్తి చేసినప్పటికీ, డబ్బింగ్ ప్రక్రియ నెమ్మదిగా సాగుతోంది. డబ్బింగ్ కార్యక్రమాలన్నీ పూర్తి చేసేందుకు అదనంగా వారం పట్టవచ్చని తెలుస్తోంది. ఈ జాప్యం సినిమా ప్రమోషన్ లో సవాలుగా మారుతుందని సినీ విశ్లేషకులు భావిస్తున్నాయి.
పవన్ పొలిటికల్ టూర్లతో బిజీగా ఉండడంతో ఈసారి ప్రమోషన్ బాధ్యతలను సాయి ధరమ్ తేజ్ తీసుకోవాలని సూచించారట. పవన్ కళ్యాణ్ ఈ సినిమా ప్రమోషన్ కు వస్తారని ఎటువంటి నమ్మకం లేదు. తేదీ మరియు లొకేషన్‌తో సహా ‘బ్రో: ది అవతార్’ ప్రీ-రిలీజ్ ఈవెంట్ ప్లాన్‌లు ఇంకా ప్రకటించలేదు.
ఒకవేళ పవన్ హాజరైతే, సభను నిర్వహించడం కష్టతరంగా మారే అవకాశం ఉన్నందున, ఈవెంట్‌ను చక్కగా నిర్వహించడం, ఆశించిన మేరకు జన సమీకరణ చాలా అవసరం. ఈ పరిస్థితులన్నింటినీ పరిగణనలోకి తీసుకుంటే, పోస్ట్ ప్రొడక్షన్ పనులను వేగవంతం చేయడం చాలా కీలకం. సినిమా విడుదలకు సంబంధించిన మొత్తం షెడ్యూల్ మరింత టైట్‌గా ఉంది. గడువును పూర్తి చేసేందుకు ప్రయత్నాలు చేయాలి.
