బ్రిటన్ క్వీన్ ఎలిజబెత్ -2 హాజరు కాకుండానే బ్రిటన్ పార్లమెంట్ సమావేశాలు ప్రారంభమయ్యాయి. బ్రిటన్ చరిత్రలో రాణి హాజరు కాకుండా పార్లమెంట్ సమావేశాలు జరిగిన దాఖలాలు అరుదుగా మాత్రమే! ఎలిజబెత్ గర్భం దాల్చిన రెండు సమయాల్లో అంటే 1959 లో ఒకసారి 1963 లో మరోసారి మాత్రమే రాణి ఎలిజబెత్ పాల్గొనకుండా సమావేశాలు జరిగాయి.
మళ్ళీ ఇన్నాళ్ల తర్వాత రాణి పాల్గొనకుండా జరిగిన సమావేశాలు ఇప్పుడు మాత్రమే. అయితే రాణి ఈ సమావేశాలకు హాజరు కాకపోవడానికి వయోభారం కారణమని తెలుస్తోంది. రాణి వయసు 96 సంవత్సరాలు. ఈ వయసులో ఆమె సరిగ్గా నడవలేకపోతున్నారు. పైగా ఆమధ్య కరోనా బారిన పడ్డారు కూడా. అయితే ఈ సమావేశాలకు రాణి హాజరు కాకపోయినప్పటికీ ఆమె వారసుడు ప్రిన్స్ ఛార్లెస్ ( 73) పాల్గొన్నాడు.
