Kamal Haasan Vikram movie : విశ్వనటుడు కమల్ హాసన్ నటించిన సినిమా విక్రమ్. ఈ సినిమా లోకేశ్ కనగరాజు దర్శకత్వంలో వచ్చింది. ఈయన కమల్ హాసన్ కు వీరాభిమాని. ఇవన్నీ పక్కన ఉంచితే ఈ సినిమా సాధించిన సెన్సేషన్ అంతా ఇంతా కాదు. ఇందులో హేమా హేమీలు నటించారు. విజయ్ సేతుపతితో పాటు ఫహద్ ఫాసిల్ వంటి స్టార్ నటులు ఉన్నారు. ఇంత మంది స్టార్ హీరోల మధ్య ఒక చిన్న మనిషి(మరుగుజ్జు) ఆకర్షణగా నిలిచాడు. ఇతను రజనీకాంత్ ‘జైలర్’లో కూడా లీడ్ రోల్ చేశాడు. ఇప్పుడు ప్రేక్షకుల కళ్లన్నీ ఆయనమీదే ఉన్నాయి. అతను ఎవరు? బ్యాగ్రౌండ్ ఏంటి? అని గూగుల్ లో సెర్చ్ చేస్తున్నారు. ఆయన గురించి ఇప్పుడు తెలుసుకుందాం.
అతని పేరు జాఫర్ సాదిక్. తమిళనాడులోని ఈరోడ్ ఆయన జన్మస్థలం. 04 జూలై, 1995న జన్మించాడు జాఫర్. ప్రస్తుతం తమిళ, తెలుగు ఇండస్ట్రీలో నటిస్తున్న ఇతను నటుడు మాత్రమే కాదు. కొరియోగ్రఫార్ కూడా. ‘జాఫర్ ఉంగలిల్ యార్ ప్రభుదేవా’ అనే తమిళ డాన్స్‌షోలో పాల్గొని మంచి ప్రతిభ చాటాడు. ఆ షోతో జాఫర్ కు మంచి గుర్తింపు దక్కింది. దీని నుంచి స్ఫూర్తి పొందిన ఆయన సొంతంగా ఓ డాన్స్ స్టూడియోను ఏర్పాటు చేశాడు. దాని పేరు ‘లిప్టదర్స్’. దీంతో పాటు ఈయన సోషల్ మీడియా ఇన్ ప్లుయెన్సర్ కూడా.
జాఫర్ సాదిక్ కు ఇన్ స్టాలో 5 లక్షల మంది ఫాలోవర్స్ ఉన్నారు. చాలా వరకు ఈవెంట్లు, స్టేజీ షోలలో పాల్గొన్నాడు. 2018లో ఆయన tedxgct ఈవెంట్ లో చేసిన పెర్ఫార్మెన్స్ విపరీతంగా ఆకట్టుకుంది. ఆ తరువాత సినిమాల్లో నటించడం ప్రారంభించాడు. నెట్ ఫ్లిక్స్ లో రిలీజైన తమిళ సిరీస్ ‘పావకధైగల్’లో నారికొట్టిగా నటించాడు. ఈ పాత్ర ఆయనకు బాగా కలిసి వచ్చింది. ఆ తరువాత విక్రమ్ లో అవకాశం వచ్చింది. ప్రస్తుతం అట్లీ దర్శకత్వంలో వస్తున్న జవాన్ లో కూడా నటిస్తున్నట్టు సమాచారం.
