New Jersey Ayyappa Deeksha : కోరిక కోర్కెలు నెరవేర్చే కొంగు బంగారంగా కొలువైన దేవుడు అయ్యప్ప స్వామి. కార్తీకం వచ్చిదంటే చాలు ఆయనకు పూజలు చేస్తూ భక్తులు తరిస్తారు. స్వామిని కొలిచేందుకు ఉవ్విళ్లూరుతారు. హరిహర సుతుడు అయ్యప్పను ఆరాధిస్తే సకల శుభాలు కలుగుతాయని బలంగా విశ్వసిస్తారు. స్వామిని కొలుస్తూ మండల రోజులు (వారికి వీలైనన్ని రోజులు) దీక్షలు స్వీకరిస్తారు. నల్లటి (కాషాయం) దుస్తులు ధరించి మండల రోజులు (41 రోజులు) ప్రతీ రోజు స్వామి వారికి పూజలు, వ్రతాలు, హోమాలు నిర్వహిస్తూ తరిస్తారు.
సూర్యోదయం కంటే ముందు బ్రహ్మ ముహూర్తంలో లేచి చన్నీటి స్నానం చేసి పూజాధికాలు పూర్తి చేసుకొని వృత్తి పనిలో పడతారు. మధ్యాహ్నం స్వాములంతా కలిసి భిక్ష స్వీకరిస్తారు. ఇక సాయంత్రం పడిపూజలు చేపడుతూ భజనలు, సంప్రదాయ నృత్యాలు చేస్తూ ఆనందంగా గడుపుతారు. భారత్ లో ఈ విధంగా స్వామి వారిని కొలుస్తారు. అయితే అమెరికాలో కూడా ఇదే విధంగా స్వామి వారిని కొలుస్తూ భక్తులు తరిస్తున్నారు.
న్యూ జెర్సీలోని హిందూ అమెరికన్ టెంపుల్ అండ్ కల్చర్ సెంటర్ ఆధ్వర్యంలో కొనసాగే శ్రీ గురువాయోరప్పన్ టెంపుల్ లోని శ్రీ కృష్ణ మందిరం స్వాములకు మండల దీక్షలను ఇస్తుంది. మండల దీక్షను 16 నవంబర్, 2023న ఆలయం నిర్వాహకులు ప్రారంభించనున్నారు. ఆలయంలో ప్రతీ శనివారం ఉదయం 7 గంటలకు అయ్యప్పకు అభిషేకం, భజనలు నిర్వహిస్తారు. శాస్త్ర ప్రీతి ఆనువల్ అయ్యప్ప పూజను సోమవారం 25 డిసెంబర్, 2023న నిర్వహించి ఇరుముడి కడతారు.
వ్రతం పూజలు మండల దీక్ష తీసుకున్న వారికి 15 నవంబర్, 21 రోజుల దీక్ష తీసుకున్న వారికి 5 డిసెంబర్, 11 రోజుల దీక్ష తీసుకున్న వారికి 15 డిసెంబర్ రోజున నిర్వహిస్తారు. ఇరుముడి మకర జ్యోతి దర్శనం 14 జనవరి, 2023న ఉంటుందని తెలిపారు. స్వాములు, భక్తులు అధిక సంఖ్యలో పాల్గొనాలని నిర్వాహకులు కోరారు.