IPL CSK : ఐపీఎల్-2024 సీజన్ కోసం డిఫెండింగ్ ఛాంపియన్ చెన్నై సూపర్ కింగ్స్ కీలక నిర్ణయం తీసుకోనున్నట్లు తెలుస్తోంది. రూ.16.25 కోట్లతో రికార్డు ధరకు కొనుగోలు చేసిన ఇంగ్లండ్ టెస్టు కెప్టెన్ బెన్ స్టోక్స్ ను వదిలేయాలని సీఎస్ కే భావిస్తున్నట్లు సమాచారం. ఐపీఎల్ 2023 సీజన్‌లో సీఎస్కే లో చేరిన స్టోక్స్ గాయం కారణంగా కేవలం రెండు మ్యాచ్‌లు మాత్రమే ఆడాడు. ఆ రెండు మ్యాచ్‌ల్లో 15 పరుగులు మాత్రమే చేసి నిరాశపరిచాడు. అతను ఒక ఓవర్ మాత్రమే బౌలింగ్ చేశాడు. ఆల్‌రౌండర్‌గా తన సేవలు అందిస్తాడనుకున్న ఈ టాప్ ప్లేయర్ ఫామ్ కోల్పోయాడు. వన్డే ప్రపంచకప్ 2023కి ముందు స్టోక్స్ తన రిటైర్మెంట్‌ను వెనక్కి తీసుకున్నాడు. అయితే ప్రస్తుతం వెన్ను గాయంతో బాధపడుతున్న స్టోక్స్ కొన్నాళ్లు బ్యాట్స్‌మెన్‌గా మాత్రమే జట్టులో కొనసాగనున్నాడు. వరుస టోర్నీలతో ఒత్తిడి ఉండడంతో ఐపీల్ కు దూరం కానున్నట్లు తెలుస్తున్నది. దీంతో సీఎస్కే యాజమాన్యం కూడా స్టోక్స్‌ను వదులుకోవడం మేలని భావిస్తున్నది. అతని స్థానంలో ఆస్ట్రేలియా కెప్టెన్ పాట్ కమిన్స్‌ను జట్టులోకి తీసుకోవాలనే ఆలోచనలో ఉన్నట్లు తెలుస్తున్నది
బెన్ స్టోక్స్ ఐపీఎల్ 2024ను వదులుకోవడానికి కారణాలు ఇవే..
2023 ప్రపంచ కప్‌లో ఆడేందుకు స్టోక్స్ సిద్ధంగా ఉన్నందున, అతను ఒకటిన్నర నెలల పాటు భారత్‌లో ఉంటాడు. ఇంగ్లండ్ ఫైనల్ ఆడితే, వెస్టిండీస్ (డిసెంబర్) పర్యటనకు ముందు ఇంగ్లాండ్ ఆటగాళ్లకు కేవలం ఒక నెల మాత్రమే విరామం ఉంటుంది. వెస్టిండీస్ తర్వాత, ఇంగ్లండ్ దాదాపు రెండు నెలల పాటు భారత్‌లో 5 మ్యాచ్‌ల టెస్ట్ సిరీస్ ఆడనుంది. ఇండియా vs ఇంగ్లాండ్ సిరీస్ ముగిసిన వెంటనే, ఐపీఎల్ 2024 ప్రారంభమవుతుంది. స్టోక్స్ ఐపీఎల్ ని ఎంచుకుంటే, అతను దాదాపు 5 నెలల పాటు తన ఇంటికి దూరంగా ఉండాల్సి వస్తుంది. ఇది అతనికి, అతని శరీరానికి సాధ్యం కాదు.
అంతేకాకుండా ఐపీఎల్ 2024 తర్వాత వెంటనే ప్రారంభం కానున్న 2024లో జరిగే టీ20 ప్రపంచకప్‌కు అతను పూర్తిగా ఫిట్‌గా ఉండేందుకు మోకాలి శస్త్రచికిత్స చేయించుకోవాల్సి ఉంటుంది. ఈ క్రమంలో స్టోక్స్ ను సీఎస్ కే కొనసాగించాలనుకుంటే మళ్లీ 16.25 కోట్లు వెచ్చించాల్సి ఉంటుంది. దీనికి బదులుగా అతనిని విడిచిపెట్టడం ద్వారా సీఎస్కేకు భారం తప్పుతుంది. బదులుగా మరో సీమ్ బౌలింగ్ ఆల్-రౌండర్‌ని ప్రయత్నించవచ్చు. ఒకవేళ స్టోక్స్ ఐపీఎల్ 2025కి తనను తాను అందుబాటులో ఉంచుకుంటే, సీఎస్కే అతన్ని మరొక ఫ్రాంచైజీకి కోల్పోయే ప్రమాదం ఉంది. బెన్ స్టోక్స్ అంతర్జాతీయ కెప్టెన్సీ అనుభవం ఉన్న అనుభవజ్ఞుడైన నాయకుడిని సీఎస్కే ఎంపిక చేసుకుంది.
