Sidhu Jonnalagadda : రంగుల ప్రపంచంలో ఎప్పుడు, ఎక్కడ, దేనికి సక్సెస్ వస్తుందో.. ఏది ఇండస్ట్రీ నుంచి వెళ్లగొడుతుందో చెప్పలేం. ఒక సినిమాతో రోడ్డున పడ్డ హీరోలు ఉన్నారు. అదే ఒక్క సినిమాతో స్టార్ ఇమేజ్ దక్కించుకున్న వారు కూడా లేకపోలేదు. ఒక్క సినిమాతో ఇమేజ్ మారిపోయిన వారు చాలా తక్కువ మందే ఉన్నారు.
సిద్ధూ జొన్నలగడ్డను చూసుకుంటే ఈ హీరో ఇండస్ట్రీలో చాలా సినిమాల్లో నటించాడు. కానీ ఏ సినిమా వచ్చిందో.. ఏ సినిమాలో కనిపించాడో చెప్పడం కష్టంగా మారింది. ‘కృష్ణ అండ్ హిజ్ లీల’లో మంచి గుర్తింపు ఉన్నా.. ‘డీజే టిల్లు’ మాత్రమే టాలీవుడ్ ఇండస్ట్రీలో స్టార్ ఇమేజ్ తెచ్చిపెట్టింది. డీజే టిల్లు ముందు ఐదేళ్లపాటు ఇండస్ట్రీలో నిలదొక్కుకునేందుకు విపరీతంగా పోరాడాడు. ఆ కష్టాన్ని మొత్తం మరిపించింది డీజే టిల్లు.
డీజే టిల్లు తర్వాత టిల్లు స్క్వేర్ చేశాడు సిద్ధూ. ఇది కూడా వరల్డ్ వైడ్ బాక్సాఫీస్ ను కలెక్షన్లతో ముంచెత్తింది. టిల్లు స్క్వేర్ ను బగా ప్రమోట్ చేసి.. క్రేజీ ప్రోమోలు రిలీజ్ చేసి మూవీపై హైప్ పెంచాడు. ఇప్పుడు ఈ సినిమా బాక్సాఫీస్ వద్ద అద్భుతాలు సాధిస్తోంది. ఫస్ట్ షో నుంచి ఎక్కడ చూసినా హౌస్ ఫుల్ బోర్డులే కనిపిస్తున్నాయి.
‘టిల్లు స్క్వేర్’ కు వీకెండ్ సాయంత్రం షోలకు టికెట్లు దొరకడం కష్టమై పోయింది. శనివారం, ఆదివారం ఫస్ట్, సెకండ్ షోలు ప్యాక్డ్ హౌస్లతో నడిచాయి. ఆదివారం అన్ని షోలు ఆక్యుపెన్సీతో నడవబోతున్నాయి. సినిమా గ్రాస్ రూ.50 కోట్ల గ్రాస్ మార్కు చేరువలో ఉంది.
నిర్మాత నాగవంశీ ఫస్ట్ డే మాట్లాడుతూ ‘ఈ మూవీ రూ. 100 కోట్ల గ్రాస్ అందుకున్నా ఆశ్చర్యం లేదు’ అన్నాడు. విజయ్ ఫ్యామిలీ స్టార్ ఓపెనింగ్స్ ను సైతం ఈ సినిమా ప్రభావితం చేస్తుందంటే ఎంతలా క్రేజీ పొందిందో చూడవచ్చు.
చిన్న హీరో స్థాయి నుంచి.. మిడ్ రేంజ్ హీరోలైన నాని, విజయ్ దేవరకొండ, రామ్ పోతినేని, అడివి శేషుల సరసన చేరాడు సిద్ధు జొన్నలగడ్డ. తనకున్న రైటింగ్ స్కిల్స్ కు, నటనకు సిద్ధూ ఇంకా పెద్ద స్థాయికి చేరే అవకాశముంది.