నిఖిల్ హీరోగా నటించిన కార్తికేయ 2 బాలీవుడ్ లో దుమ్ము రేపుతోంది. హిందీలో కేవలం ఈ చిత్రాన్ని మొదట 50 స్క్రీన్ లలో మాత్రమే విడుదల చేసారు. ఆ తర్వాత స్పందన బాగుండటంతో మెల్లిగా 100 స్క్రీన్ లకు పెంచారు. ఆ తర్వాత 300 స్క్రీన్ లు ఇక ఇప్పుడేమో ఏకంగా 1000 కి పైగా స్క్రీన్ లలో రన్ అవుతోంది కార్తికేయ 2.
దాంతో వసూళ్ల వర్షం కురిపిస్తోంది. కేవలం 50 స్క్రీన్ లలో సరదాగా వేద్దామని అనుకున్న అల్లు అరవింద్ కు ఈ సినిమా భారీ ఎత్తున లాభాలు తెచ్చిపెడుతోంది. గతకొంత కాలంగా తెలుగు సినిమా యావత్ భారత్ సినిమా రంగాన్ని ఒక ఊపు ఊపేస్తోంది. ఆ కోవలోనే ఇప్పుడు కార్తికేయ 2 కూడా సంచలనం సృష్టిస్తోంది.
చందు మొండేటి దర్శకత్వంలో తెరకెక్కిన కార్తికేయ 2 తెలుగులోనే కాకుండా విడుదలైన అన్ని భాషల్లో భారీ వసూళ్ళని సాధిస్తోంది. అమీర్ ఖాన్ , అక్షయ్ కుమార్ లాంటి సూపర్ స్టార్ హీరోల సినిమాలను కూడా పక్కన పెట్టి కార్తికేయ 2 కు బ్రహ్మరథం పడుతున్నారు ప్రేక్షకులు. కృష్ణతత్వం గురించి గొప్పగా చెప్పారని ప్రేక్షకులు ఫిదా అవుతున్నారు. నిఖిల్ – అనుపమ పరమేశ్వరన్ జంటగా నటించగా కీలక పాత్రల్లో అనుపమ్ ఖేర్ , శ్రీనివాస్ రెడ్డి తదితరులు నటించారు.
