Balayya Vs Kodali Nani : కొడాలి వెంకటేశ్వరరావు అలియాస్ నాని. టీడీపీని, చంద్రబాబును దూషించేందుకే ఈయన రాజకీయాల్లో ఉన్నారా? ఆయన్ను అందుకు మాత్రమే జగన్ వాడుకుంటున్నాడా? అని జనాలకు పెద్ద అనుమానం. మంత్రి పదవిలో ఉన్నా, ఎమ్మెల్యే పదవిలో ఉన్నా, ఆయన చేసిన అభివృద్ధి ఏంటో, సంక్షేమం ఏంటో ఎవరికీ అర్థం కాదు. నోరుతెరిస్తే బూతులు, పరుషపదాలు, అహంకార మాటలు తప్ప వేరేరావు. రాజకీయాలను కంపు చేసిన వారిలో ఈయనదే అగ్రస్థానం.
కొడాలి నాని గుడివాడ ఎమ్మెల్యేగా 2004నుంచి వరుసగా గెలుస్తున్నారు. రాబోయే ఎన్నికల్లో కొడాలి నాని అసెంబ్లీలోకి అడుగుపెట్టకుండా చూడాలని టీడీపీ అధినేత భావిస్తున్నట్లు తెలుస్తోంది. కొడాలి అహంకారానికి ఇక స్వస్తి పలుకాలని, ఆయన రాజకీయ జీవితానికి జనాలతోనే చరమగీతం పాడాలని భావిస్తున్నారు. కొడాలి దురుసు మాటల్లో చిన్నా, పెద్దా, మహిళలు..అనే ఇంగితం కూడా ఉండదు.. ఇలాంటి వాటికి తెరపడాలంటే ఆయన్ను ఓడించాల్సిందేనని ఫిక్స్ అయ్యారు.
నోటిదూల ఎక్కువున్న కొడాలి నానిని దెబ్బకొట్టడానికి టీడీపీ అధినేత పెద్ద వ్యూహం రచిస్తున్నారని సమాచారం. గుడివాడ నుంచి బాలయ్యను పోటీ చేయించి.. కొడాలికి ఓటమి రుచి చూపించాలని చంద్రబాబు భావిస్తున్నారని తెలుస్తోంది. ఇప్పటికే దీనిపై చంద్రబాబు చర్చలు చేస్తున్నట్టు సమాచారం. కాగా, గుడివాడ నియోజకవర్గ ఇన్ చార్జిగా వెనిగండ్ల రాము ఇప్పటికే అక్కడ ప్రచారం చేసుకుంటున్నారు. ఆయనకు ఎమ్మెల్సీ పదవి ఇచ్చి బాలయ్యకు సపోర్ట్ చేసేవిధంగా చేయనున్నట్టు మీడియా వర్గాలు చెపుతున్నాయి.
మరి బాలయ్య గుడివాడ నుంచి పోటీ చేస్తే హిందూపురం నుంచి ఎవరిని పోటీ చేయిస్తారు.. అనే సందేహాలు క్యాడర్ లో మెదులుతున్నాయి. అయితే లోకేశ్ ను మంగళగిరితో పాటు హిందూపురంలో కూడా పోటీ చేయిస్తారని ప్రచారం జరుగుతోంది. రెండు చోట్ల పోటీ చేయిస్తే.. మంగళగిరిలో గెలవరనే భయంతోనే హిందూపురంలో కూడా పోటీ చేయిస్తున్నారని ప్రత్యర్థులు దుష్ప్రచారం చేసే అవకాశాలు కూడా ఉన్నాయి. కాబట్టి ఆ నిర్ణయం తీసుకుంటారో లేదో చూడాలి. లేదా ఇతర టీడీపీ ప్రముఖులను అయినా హిందూపురంలో పోటీ చేయించే అవకాశాలు ఉండొచ్చు. ఆ విషయం ఇప్పుడే చెప్పలేం. కానీ గుడివాడలో మాత్రం ఈసారి కొడాలి నానిపై టీడీపీ అధినేత చంద్రబాబు ప్రత్యేక దృష్టి పెట్టినట్లు తెలుస్తోంది. ‘గుడివాడ’ నియోజకవర్గం నందమూరి కుటుంబానికి ఫ్యాన్ బేస్ బాగుంటుంది కాబట్టి.. అందులో బాలయ్య బరిలోకి దిగితే కొడాలి నానికి ఓటమి ఖాయమేనని విశ్లేషకులు చెపుతున్నారు.