BRS Behavior : చంద్రబాబు అరెస్ట్ పై తెలంగాణ సీఎం కేసీఆర్ స్పందించకపోవడం వెనుక ఆంధ్రా సమాజం గుర్రుగా ఉంది. ప్రత్యేక రాష్ట్రం ఉద్యమం నడిపి తెలంగాణ సాధించుకొని కుర్చీ ఎక్కిన కేసీఆర్ సొంత రాష్ట్రం గురించి చూసుకోక ఆంధ్రా పొలిటికల్ లో వేలు పెడుతున్నారంటూ ఆంధ్రా సమాజం ఆగ్రహం వ్యక్తం చేస్తోంది.
ఒకప్పటి టీడీపీ నాయకుడు, పొరుగు రాష్ట్రం సీఎం కేసీఆర్ ఇప్పటి వరకు ఎటువంటి ప్రకటన చేయలేదు. ఇక ఇటీవల ఆయన కొడుకు కేటీఆర్ స్పందించి.. ‘ఆంధ్రాతో తమకేం సబంధం, అక్కడ టీడీపీ, వైసీపీల మధ్య గొడవ జరిగితే మేమెందుకు స్పందించాలి. ఆయన కోసం హైదరాబాద్ లో ధర్నాలు చేస్తే ఊరుకోం అని హెచ్చరించారు. మీ రాష్ట్రానికి వెళ్లి ధర్నాలు చేసుకోండి’ అన్నారు.
ఇటీవల మంత్రి హరీశ్ రావు మాత్రం ‘అయ్యో’ అన్నారు గానీ అంతకు మించి మాట్లాడలేదు. ఇక చంద్రబాబు అరెస్ట్ పై ఎవరైనా ( తన భావమరిదిని ఉద్దేశించి) మాట్లాడితే అది పూర్తిగా వారి వ్యక్తిగతం పార్టీకి ఎటువంటి సంబంధం లేదని సన్నాయి నొక్కులు నొక్కారు.
ఇక ఎన్నికలు దగ్గరకు వచ్చిన తరుణంలో మరో రాగం అందిపుచ్చుకున్నారు. ఖమ్మంలో శ్రీకృష్ణుడి వేషధారణలో ఉన్న నందమూరి తారక రామారావు విగ్రహాన్ని కేటీఆర్ ప్రారంభించారు. ఈ సందర్భంగా ఆయన మాట్లాడుతూ ‘మాకు రాముడు, కృష్ణుడు ఎలా ఉంటాడో తెలియదు. అందరినీ ఆయనలోనే చూశాం. తెలుగు వారి ప్రతిభను ఖండాంతరాల్లోకి తీసుకెళ్లిన వ్యక్తి ఎన్టీఆర్. మా నాన్న గారు కూడా ఆయన కేబినెట్ లో మంత్రిగా పని చేశారు. ఆయనపై ఉన్న అభిమానంతోనే నాకు తారక రామారావు అని పేరు పెట్టుకున్నారు. ఆ పేరే చాలా పవర్ ఫుల్’ అన్నాడు.
త్వరలో తెలంగాణ శాసనసభకు ఎన్నికలు జరగనున్నాయి. ఈ నేపథ్యంలో అక్కడ ఉన్న ఆంధ్రా సెటిలర్ల ఓట్లు కీలకం కానున్నాయి. కాబట్టి ఈ సన్నాయి నొక్కులు అని అందరికీ అర్థం అవుతూనే ఉంది. ఈ పొగడ్తలు అన్నీ ఆంధ్రా ఓటర్లను ప్రసన్నం చేసుకునేందుకే అని అర్థమవుతుంది. పొరుగు రాష్ట్రాల రాజకీయాలతో తమకు సంబంధం లేదని చెప్పిన వారు అక్కడి రాజకీయాల్లో వేలు పెడుతూ ఎవరు సీఎం కావాలో.. వద్దో నిర్ణయిస్తుంటారు.
బాబు అరెస్ట్ పై స్పందించాలని ఇప్పటి వరకు టీడీపీ నేతలు గానీ, కార్యకర్తలు గానీ కేసీఆర్ ను కోరలేదు. కానీ మౌనం వహిస్తున్నారంటే ఏమని అర్థం చేసుకోవాలి.. జగన్ కు తెలంగాణ సపోర్ట్ అనే కదా అర్థం వచ్చేది. బాహాటంగా చెప్తే ఎన్నికల్లో ఆంధ్రా ఓట్లు పోతాయని అనుకుంటున్న బీఆర్ఎస్ కు ఎలా బుద్ధి చెప్పాలో ఆంధ్ర జనంకు తెలుసని బాబు అభిమానులు, ఆంధ్రా పెద్దలు అంటున్నారు.