Stop Jr. NTR : టీడీపీ అధినేత చంద్రబాబు అరెస్ట్ పై ఇంతవరకు జూనియర్ ఎన్టీఆర్ స్పందించడం లేదు. టీడీపీకి ఎలాంటి ఆపద వచ్చినా తన అభిప్రాయం వెల్లడించే ఎన్టీఆర్ ఇంతవరకు బాబు అరెస్టు మీద రెస్పాన్స్ చూపడం లేదు. కనీసం సోషల్ మీడియాలో ఒక్క సందేశం కూడా పెట్టడం లేదు. ఎన్టీఆర్ ను ఆపే శక్తి ఏమిటనేది తెలియడం లేదు. ఎన్టీఆర్ ఎందుకు పెదవి విప్పడం లేదు.
చంద్రబాబు, లోకేష్, బాలక్రిష్ణ పార్టీ కోసం పనిచేస్తుంటారు. జూనియర్ ఎన్టీఆర్ కూడా పార్టీ కష్టాల్లో ఉన్నప్పుడు తన వంతు సాయం చేయడానికి వెనకాడేవారు కాదు ఎన్టీఆర్. కానీ ఈ సారి మాత్రం ఎందుకో పెదవి విప్పడం లేదు. దీంతో టీడీపీ వర్గాల్లో చర్చ నడుస్తోంది. జూనియర్ ఎన్టీఆర్ అంతర్గతంగా ఏం ఆలోచిస్తున్నారనే విషయం చర్చనీయాంశంగా మారింది.
గత ఏడాది కేంద్ర హోం మంత్రి అమిత్ షా తెలంగాణ పర్యటనకు వచ్చినప్పుడు జూనియర్ ఎన్టీఆర్ తో సమావేశమయ్యారు. అప్పుడు ఆర్ఆర్ఆర్ సినిమా గురించి చర్చించుకున్నారనే వార్తలు వచ్చాయి. వారి మధ్య జరిగిన మాటలు ఏమిటనేది ఇప్పటికి కూడా బయటకు రాలేదు. ఆ భేటీలోనే చంద్రబాబు అరెస్టు గురించి చర్చించారో ఏమో అనే సందేహాలు వస్తున్నాయి.
చంద్రబాబును అరెస్టు చేయించింది బీజేపీ అని మరో వాదన కూడా ఉంది. దీంతో ఇవన్నీ చూస్తుంటే దీనికి ఆజ్యం పోసినట్లు అవుతుంది. జూనియర్ ఎన్టీఆర్ ను మాట్లాడకుండా చేసింది అమిత్ షా అనే వదంతులు కూడా వస్తున్నాయి. ఈ నేపథ్యంలో ఇందులో నిజమెంతో తెలియడం లేదు. కానీ ఈ విషయంలో నోరు విప్పకపోవడానికి కారణం అమిత్ షా అని పలువురు అనుమానాలు వ్యక్తం చేయడం గమనార్హం.
