Janasena Declare : ఏపీలో పవన్ కళ్యాణ్ ముందస్తు జపం చేస్తున్నారు. ఇప్పటికే షెడ్యూల్ మేరకు షూటింగ్ లను పూర్తి చేసుకున్న ఆయన ఇప్పుడు యాగాలు, యాత్రలపై పడుతున్నారు. అయితే ఇందులో ఒక విషయం దాగుంది. అదేంటంటే ఈ మధ్య పవన్ కళ్యాణ్ ముందస్తు ఎన్నికలు వస్తాయని మాటి మాటికీ చెప్తున్నారు. దీంతో ఏపీ ప్రజలతో పాటు, రాజకీయ విశ్లేషకులు కూడా ఆయన మాటలపై పెదవి విరుస్తున్నారు.
పవన్ కళ్యాణ్ ఏదో చెప్పడమే కాదు.. డిక్లేర్ కూడా చేస్తున్నాను అంటూ ప్రకటిస్తున్నారట. గతంలో చంద్రబాబు నాయుడు కూడా ముందస్తు అంటూ జపం చేశారు. టీడీపీ అనుకూల మీడియానే దీనిపై రచ్చ రచ్చ చేసింది. అయితే ముందస్తు అనే పదాన్ని ఎప్పటికప్పుడు వైసీపీ ఖండిస్తూనే ఉంది. ప్రస్తుతం పవన్ కళ్యాణ్ కూడా అదే జపం వళ్లిస్తుండడంతో పార్టీ శ్రేణులు కూడా కొంచెం నిరాశకు గురవుతున్నట్లు తెలుస్తోంది. తెలంగాణతో పాటు ఏపీకి కూడా ఎన్నికలు రాబోతున్నాయంటూ కామెంట్స్ చేశారు.
ముందస్తు ఎన్నికలు అనే విషయం పవన్ కళ్యాణ్ ఎలా తెలిసింది అంటూ అనుమానాలు వినిపిస్తున్నాయి. అయితే సీఎం జగన్ ఆయన మంత్రి వర్గంతో నిర్వహించిన సమావేశంలో ముందస్తుకు వెళ్లేది లేదు.. ఎన్నికలు గడువు మేరకే జరుగుతాయని చెప్పారు. ఇది కూడా బాహాటంగానే ప్రకటించారు. అయినా కూడా పవన్ ఇలా మాట్లాడడం ఏంటని కొందరు మందిపడుతున్నారు.
అసలు ఆయనకు సోర్స్ ఎక్కడి నుంచి వచ్చింది అన్న అనుమానాలు కూడా వ్యక్తం అవుతున్నాయి. అయితే చంద్రబాబు నాయుడే పవన్ కళ్యాణ్ తో అలా చెప్పిస్తున్నాడన్న అనుమానాలు లేకపోలేదు. ముందస్తును దృష్టిలో ఉంచుకొని ‘వారాహి యాత్ర’ నిర్వహిస్తున్నారా..? అంటూ కొందరు ప్రశ్నిస్తున్నారు. సీఎం ముందస్తు లేదనడం, బాబు, పవన్ తెలంగాణతో పాటు ఎన్నికలు అనడం.. దీనికి తోడు మొన్న టీడీపీ మహానాడు, నేడు పవన్ వారాహి యాత్ర నేపథ్యంలో ప్రజలు, ఆయా పార్టీల కేడర్ తీవ్ర కన్ఫ్యూజన్ లో ఉంది.
పవన్ కళ్యాణ్ ముందస్తు అంటూ ఏపీలో వేడి రాజేస్తున్నారా..? లేక జనసైనికుల్లో వేడి పుట్టిస్తున్నారా అన్నది ప్రశ్నగానే ఉంది. రాజకీయాల్లో అదీ ఒక పార్టీకి అధ్యక్షుడిగా ఉన్నప్పుడు హుందాగా ప్రవర్తించాలి, అలానే ప్రకటనలు కూడా ఉండాలి కానీ ఇలాంటి అసందర్భ స్టేట్ మెంట్లతో ప్రజలు, పార్టీ కేడర్ ఇబ్బంది పడుతుందని మరువద్దని రాజకీయ ఉద్ధండులు పవన్ కు సూచిస్తున్నారు.
ముందే ఎన్నికలు వస్తే పని చేసి ప్రభుత్వం ఏర్పాటు చేసుకోవాలని విపక్షాలకు ఉంటుంది కానీ, పాలకపక్షంకు ఎందుకు ఉంటుంది. అయినా పవన్ హడావుడి చేస్తూ పలుచన అవుతున్నారన్న కామెంట్లు వినిపిస్తున్నాయి. ఎన్నికల విషయంలోనే ఇంత గందరగోళంగా మాట్లాడుతున్న అధ్యక్షుడు మున్ముందు ఎలా మాట్లాడుతారో అని చర్చలు మొదలయ్యాయి.
