తెలంగాణ ముఖ్య‌మంత్రి కేసీఆర్ క‌ల‌ల సౌధం కొత్త స‌చివాల‌యం ప్రారంభోత్స‌వానికి అన్ని ఏర్పాట్లు పూర్త‌య్యాయి. కొద్ది రోజుల్లోనే నూత‌న స‌చివాల‌యాన్ని ప్రారంభించేందుకు శాఖల వారీగా రాష్ట్ర ప్ర‌భుత్వం ఇప్ప‌టికే కేటాయింపులు జ‌రిపింది. ప్ర‌స్తుతం ట్యాంక్ బండ్ వ‌ద్ద గ‌ల బీఆర్ఎకే భ‌వ‌న్ నుంచే ప‌రిపాల‌న కొన‌సాగుతున్న విష‌యం తెలిసిందే. అయితే నూత‌న స‌చివాల‌య నిర్మాణం పూర్తి కావ‌డంతో..బీఆర్ఎకే భ‌వ‌న్ నుంచి శాఖల వారిగా సామాగ్రిని ఇప్ప‌టికే కొత్త సెక్రెటేరియేట్‌కు అధికారులు త‌ర‌లించే ప‌నిలో నిమ‌గ్న‌మ‌య్యారు.
ఇక శాఖల వారీగా కేటాయింపులు కూడా పూర్తైనందున ఆయా శాఖ‌ల‌కు సంబంధించిన ఫైల్స్‌ను కూడా వెంట‌నే కొత్త భ‌వ‌నంలోకి త‌ర‌లించేందుకు అవ‌స‌ర‌మైన అన్ని ఏర్పాట్లు చేసుకోవాల్సిందిగా సిబ్బందికి ఉన్న‌తాధికారులు ఆదేశాలు జారీ చేశారు. ఇక కొత్త భ‌వ‌నంలో ఒక్కోక అంత‌స్తుకు మూడు డిపార్ట్‌మెంట్ల‌ను ప్ర‌భుత్వం కేటాయించింది.
కొత్త అందుబాటులోకి వ‌చ్చిన స‌చివాల‌యం మొద‌టి అంత‌స్తును హోం,రెవెన్యూకు కేటాయించారు. రెండో అంత‌స్తులో ఆర్థిక శాఖ,మూడో ఫోర్ల్‌లో ఎస్సీ డెవ‌ల‌ప్‌మెంట్‌,వ్య‌వ‌సాయ శాఖకు కేటాయించారు. నాలుగో అంత‌స్తులో ఇరిగేష‌న్ అండ్ న్యాయ‌శాఖ,ఐద‌వ అంత‌స్తులో సాధార‌ణ ప‌రిపాల‌న శాఖ,ఇక 6వ అంత‌స్తును ముఖ్య‌మంత్రికి కేటాయించిన‌ట్లు తెలుస్తోంది. అయితే వీటితో పాటు మిగ‌తా శాఖ‌ల‌కు ఏఏ అంత‌స్తులు కేటాయిస్తార‌నేది తేలాల్సి ఉంది.
