దాదాపు 1500 సాయుధ వాహనాలు, 230 ట్యాంకులు, భారీగా మందుగుండు సామగ్రి ఉక్రెయిన్ కు అందించినట్లు ఇప్పటికే నాటో స్పష్టం చేసింది. తొమ్మిది మంది ఉక్రెయిన్ బ్రిగెడ్లకు శిక్షణ కూడా ఇచ్చామని నాటో తెలిపింది. 30వేలకు పైగా సైనికులతో ఒక్కో బ్రిగేడ్ రూపొందుతుందని స్పష్టం చేసింది. రష్యా ఆక్రమించుకున్న ప్రదేశాలను తిరిగి స్వాధీనం చేసుకునేందుకు ఇవి ఎంతగానో ఉపయోగపడతాయని నాటో సెక్రటరీ జనరల్ జేన్స్ స్టోల్బెన్ బర్గ్ చెప్పారు. ఉక్రెయిన్ ను మరింత బలోపేతం చేసేందుకు 31 దేశాలతో కూడిన నాటో కూటమి శక్తివంచన లేకుండా కృషి చేస్తుందన్నారు.
ఇక చైనా-ఉక్రెయిన్ అధ్యక్షుల మధ్య జరిగిన చర్చలపై రష్యా తనదైన శైలిలో స్పందించింది. ఈ సంభాషణతో యుద్ధం ముగుస్తుందా..? అన్న ప్రశ్నకు ఉక్రెయిన్ సంక్షోబానికి ముగింపు పలకడంతో పాటు రష్యా తన లక్ష్యాలను సాధించే దిశగా ఎటువంటి ప్రయత్నాన్ని అయినా స్వాగతిస్తామని క్రెమ్లిన్ అధికార ప్రతినిధి దిమిత్ర పెస్కోవ్ చెప్పారు. అయితే చైనా-ఉక్రెయిన్ మధ్య జరిగిన చర్చలు మాత్రం వారి ద్వైపాక్షిక చర్చలేనని తెలుస్తోంది.
