megastar : ఈ ఫొటోలో కనిపిస్తున్న వ్యక్తిని గుర్తు పట్టారా? టాలీవుడ్ లో స్టార్ గా ఎదిగి దేశంలోనే మంచి నటుడిగా గుర్తింపు పొందిన ఇతడి గురించి పరిచయం అక్కర్లేదు. ఒంటి చేత్తో ఇండస్ట్రీని ఏలుతున్నాడు. కోట్లాది మందికి అభిమాన హీరో అయ్యాడు. దేశం గర్వించదగ్గ కథానాయకుడిగా నిలిచాడు. నటన వైపు వచ్చే వారికి రోల్ మోడల్ గా ఉన్నాడు. దీంతో చాలా మంది పరిశ్రమకు వచ్చే వారికి ఆయనే ఆరాధ్య దేవుడిగా మారిన సంగతి తెలిసిందే. ఆయనే మెగాస్టార్ చిరంజీవి.
మెగాస్టార్ చిరంజీవి 1955 ఆగస్టు 22న పశ్చిమ గోదావరి జిల్లా మొగల్తూరులో జన్మించారు. 1976లో మద్రాస్ ఫిల్మ్ ఇనిస్టిట్యూట్ లో శిక్షణ తీసుకోవడానికి వెళ్లాడు. అప్పుడే పునాదిరాళ్లు సినిమాలో నటించాడు. కానీ ముందు విడుదలైంది మాత్రం ప్రాణం ఖరీదు. తరువాత మనఊరి పాండవులులో నటించాడు. ఇది కథ కాదు, రాణికాసుల రంగమ్మ వంటి చిత్రాల్లో విలన్ పాత్రల్లో నటించాడు.
1980లో వచ్చిన మొగుడు కావాలి సినిమా విజయం సాధించింది. దీన్ని తమ్మారెడ్డి భరద్వాజ నిర్మించారు. తరువాత చట్టానికి కళ్లు లేవు సినిమాలో హీరోగా కనిపించాడు. ఈ సినిమా విజయ్ దళపతి తండ్రి ఎస్ ఏ చంద్రశేఖర్ దర్శకత్వంలో వచ్చింది. ఇంట్లో రామయ్య వీధిలో క్రిష్ణయ్య సినిమా కూడా బాగా ఆడింది. కానీ ఖైదీ సినిమాతో స్టార్ హీరోగా ఎదిగాడు.
యండమూరి వీరేంద్రనాథ్ నవలల ఆధారంగా 11 సినిమాలు చేశారు. అందులో రాక్షసుడు, అభిలాష, దొంగమొగుడు వంటి సినిమాలున్నాయి. కోదండరామిరెడ్డి మెగాస్టార్ కు అత్యంత ఎక్కువ హిట్లు ఇచ్చిన డైరెక్టర్ కావడం గమనార్హం. జగదేకవీరుడు అతిలోక సుందరి చిరంజీవి కెరీర్ లో అత్యంత ప్రజాదరణ పొందిన చిత్రంగా గుర్తింపు పొందింది. ఎన్నో సినిమాల్లో తనదైన టాలెంట్ తో ఎదిగిన హీరో చిరు. నిన్న తన పుట్టిన రోజు వేడుకలు ఘనంగా జరుపుకున్నారు.