డార్లింగ్ ప్రభాస్ తో సినిమాలు చేయాలని పలువురు దర్శక నిర్మాతలు పోటీ పడుతున్నారు. అయితే బాహుబలి సినిమాల తర్వాత ప్రభాస్ రేంజ్ అనూహ్యంగా మారింది. దాంతో ప్రభాస్ డేట్స్ దొరకడం కష్టంగా మారింది. అయినప్పటికీ నేను ప్రభాస్ తో సినిమా చేయడం ఖాయమని అన్నాడు అగ్ర నిర్మాత దిల్ రాజు.
బలగం వంటి బ్లాక్ బస్టర్ చిత్రాన్ని నిర్మించిన దిల్ రాజు ఆ సినిమా ఇచ్చిన జోష్ లో చాలా సంతోషంగా ఉన్నాడు. ఇక ఇదే సమయంలో 20 సంవత్సరాల క్రితం నితిన్ హీరోగా వివివినాయక్ దర్శకత్వంలో తెరకెక్కిన చిత్రం ” దిల్ ”. ఆ చిత్రం తోనే దిల్ రాజు నిర్మాతగా మారాడు. దిల్ సినిమా రిలీజ్ అయి 20 ఏళ్ళు అవుతుండటంతో సోషల్ మీడియాలో నెటిజన్ల తో ఇంటరాక్ట్ అయ్యాడు దిల్ రాజు.
ఇక ఆ సందర్బంగా పలువురు నెటిజన్లు పలు ప్రశ్నలు సంధించారు. అందులో భాగంగానే ప్రభాస్ తో సినిమా ఎప్పుడు చేస్తారు ? అంటూ ప్రశ్నించారు. దానికి సమాధానం ఇచ్చి డార్లింగ్ అభిమానులను సంతోష పరిచాడు దిల్ రాజు. ప్రభాస్ ప్రస్తుతం కమిట్ అయిన సినిమాలతో చాలా బిజీగా ఉన్నాడు. ఆ సినిమాలు అయ్యాక తప్పకుండా నేను ప్రభాస్ కలిసి ఓ సినిమా చేస్తామని చెప్పాడు.
గతంలో ప్రభాస్ హీరోగా మున్నా , డార్లింగ్ వంటి చిత్రాలను నిర్మించాడు దిల్ రాజు. మున్నా ప్లాప్ కాగా డార్లింగ్ సూపర్ హిట్ అయ్యింది. ఆ తర్వాత మళ్ళీ ప్రభాస్ తో సినిమా చేయాలనుకున్నాడు కానీ బాహుబలి తర్వాత డార్లింగ్ రేంజ్ పెరిగిపోయింది. దాంతో చాలా బిజీ అయిపోయాడు.