T-20 World Cup : వన్డే వరల్డ్ కప్ ఫైనల్ కప్ పరాజయాన్ని మరిచి 2024లో మరో పెద్ద క్రికెట్ సంబరానికి మన ఆటగాళ్లు సిద్ధమవుతున్నారు. ఈ ఏడాది ఘన విజయాలు సాధించడమే లక్ష్యంగా వారు ముందుకు కదులుతున్నారు. ప్రస్తుతానికి దక్షిణ ఆఫ్రికాలో పర్యటిస్తున్న టీమిండియా.. ఆ తర్వాత వరుసగా ఇంగ్లాండ్ తో 5 టెస్టులు ఆడనుంది. ఇక ఐపీఎల్ వల్ల ఏప్రిల్, మే నెలల్లో అంతర్జాతీయ మ్యాచ్ లకు విరామం ఉంటుంది. మన ఆటగాళ్లు దాదాపు అందరూ ఈ టోర్నిలో ఆడుతారు. ఇక జూన్ లో ప్రపంచ క్రికెట్ అభిమానులు ఎంతో ఆసక్తి ఎదురుచూసే టీ-20 ప్రపంచ కప్ వెస్టండీస్, యూఎస్ఏలో జరుగనుంది.
అయితే టీ-20వరల్డ్ కప్ లో భారత్ తన సత్తా చాటుతుందని అభిమానులు ఆశిస్తున్నారు. వన్డే ప్రపంచ కప్ కోల్పోయినా పొట్టి కప్ మాత్రం దక్కుతుందని ఆశాభావం వ్యక్తం చేస్తున్నారు. ఇక క్రికెట్ అభిమానులకు మాత్రం ఏప్రిల్, మే, జూన్ మూడు నెలల పాటు సంబరాలు కొనసాగుతాయనే చెప్పవచ్చు. దాదాపు వంద రోజుల పాటు ఐపీఎల్, పొట్టి ప్రపంచకప్ సాగనున్నాయి. దీనికి ఆటగాళ్లు ఇప్పటికే మానసికంగా సిద్ధమైపోయారు. పొట్టి కప్ ఆటల్లో ఎవరి ప్రదర్శన ఎలా ఉంటుందో ఇప్పుడే విశ్లేషణలు మొదలైపోతున్నాయి. సూర్యకుమార్ యాదవ్ చెలరేగిపోతాడని, అతడే మ్యాన్ ఆఫ్ సిరీస్ గా నిలుస్తాడని సైతం పలువురు ట్వీట్ చేస్తున్నారు. రాబోయే ఐపీఎల్, టీ-20 వరల్డ్ కప్ అంతా ‘స్కై ’దేనని ఫ్యాన్స్ ట్వీట్ చేస్తున్నారు.
కాగా, టీ-20 వరల్డ్ కప్ మ్యాచ్ ల షెడ్యూల్ ఒకటి ప్రచారంలోకి వచ్చింది. జూన్ 4 నుంచి 30వరకు మ్యాచ్ లు జరుగుతాయి. 20 జట్లు 4 గ్రూపులుగా విడిపోయి తలపడుతాయి. తాజాగా ఇండియా ఆడే మ్యాచ్ లు ఆడే తేదీలు, జట్ల వివరాలు ఇవేనంటూ ‘స్పోర్ట్స్ టాక్’ ఓ లిస్ట్ విడుదల చేసింది. లీగ్ దశలో జూన్ 5న ఐర్లాండ్, 9న పాకిస్తాన్, 12న యూఎస్ఏ, 15న కెనడా జట్లతో భారత్ మ్యాచ్ లు ఆడుతుందట. అయితే ఐసీసీ ఇప్పటివరకు వీటిపై అధికారిక పర్యటన చేయలేదు. ఇవే డేట్లు ఉంటాయా? ఇంకా ఇతర జట్ల వివరాలు.. లాంటివి అన్నీ తెలియాలంటే మరికొద్ది కాలం ఆగాల్సిందే.
